На скрыжаванні вул. Сямашкі-пр. Каралінскага ААТ «Будтрэст № 4» (генпадрадчык – СУ-13) завяршае ўзвядзенне двух новых студэнцкіх інтэрнатаў: для БДМУ на 500 месцаў і для БДУІР на 530 месцаў.
11-павярховы інтэрнат для студэнтаў-медыкаў у большай ступені гатоўнасці: унутранае аздабленне ўжо завершана, у жылых блоках ідзе зборка мэблі. Застанецца аформіць цэнтральны ўваход у інтэрнат і правесці клінінг.
Поўным ходам вядзецца таксама добраўпарадкаванне тэрыторыі: укладваецца тратуарная плітка, фармуюцца газоны. Хутка тут з'явяцца малыя архітэктурныя формы і вулічныя трэнажоры.
20-павярховы корпус інтэрната БДУІР да канца жніўня таксама будзе аддадзены пад зборку мэблі. Тут устаноўлены ўваходныя і міжпакаёвыя дзверы, цяпер дзвярныя блокі ўсталёўваюць у калідорах. На дзесяці паверхах у жылых пакоях паклеены шпалеры. Аддзелачнікі працуюць з тэмпам пяць паверхаў у тыдзень, і да канца гэтага месяца аздабленне корпуса плануецца завяршыць.
Цалкам "апранецца" ў тэрмашубу да верасня і фасад інтэрната, пачнецца яго афарбоўка.
У сцілабатнай частцы, якая злучае два інтэрнаты, памяшканні абтынкаваныя, падлога абліцавана пліткай, пачынаецца мантаж падвесных столяў і аздабленне дэкаратыўнай тынкоўкай.
Новыя студэнцкія інтэрнаты – блокавага тыпу, блокі на 2, 3, 4 і 5 чалавек, на кожны блок – кухня, санвузел і ванна. На паверхах ёсць пакоі для групавых заняткаў, памяшканні для выхавальнікаў, студсавета, псіхолага. Запраектаваныя пральня самаабслугоўвання, медблок, прасторныя вестыбюлі.
У прыбудаванай сцілабатнай частцы размесцяцца памяшканне цэнтра вольнага часу з актавай залай, буфет з абедзеннай залай на 20 пасадачных месцаў, трэнажорная зала. У абодвух карпусах створаны ўмовы для пражывання асоб з абмежаванымі магчымасцямі: ёсць блокі для такіх студэнтаў, уваходы ў вестыбюлі абсталяваны пандусамі, для калясачнікаў – прасторныя ліфты, прадугледжаны тактыльныя палосы і шыльды-ўказальнікі, маўленчыя апавяшчальнікі.
Каля інтэрнатаў будуць парковачныя месцы і прыбудаваная велапаркоўка на 19 месцаў, абсталяваная спортпляцоўка, добраўпарадкаваныя пешаходныя тратуары і дарожкі.
